UEFA vlerëson golin e Fisnik Asllanit për Hoffenheimin ndaj Beşiktaşit

Fisnik Asllani ka hyrë në analizën zyrtare të UEFA-s. Grupi Teknik i Vëzhguesve ka veçuar golin e tij për Hoffenheimin kundër Beşiktaşit si një nga dy golat më të spikatur të fazës së ligës në Ligën e Evropës, krahas golit të Vangelis Pavlidisit për Benficën ndaj Celticut.

Analizën e bënë vëzhguesit Jan Peder Jalland dhe Ian Woan, në mesin e fazës së ligës. Sipas UEFA-s, në katër xhiroat e para të edicionit 2026/27 janë shënuar gjithsej 214 gola.

Goli i Asllanit

Asllani përfundoi një asist të Tim Lemperles me një goditje në shtyllën e afërt, duke e kaluar topin mes këmbëve të mbrojtësit. UEFA thekson se pas golit qëndron më shumë se një duzinë pasimesh: lëvizja e përbashkët e gjithë vijës sulmuese e hapi rrugën.

Woan veçoi lidhjen mes mesfushorit qendror, dy sulmuesve dhe krahut të djathtë, si dhe "gatishmërinë për të sulmuar në këto hapësira". Jalland shtoi se pas prekjes së parë të Asllanit, kërcënimet nga të dyja anët "e bënë shumë të vështirë mbrojtjen". Në foton që shoqëron analizën, Asllani feston bashkë me Leon Avdullahun.

Benfica dhe 23 pasimet

Benfica e Marco Silvës kryeson grupin me pikë maksimale dhe me 13 gola, më shumë se çdo skuadër tjetër. Goli i Pavlidisit erdhi pas 23 pasimesh dhe nëntë lojtarëve të përfshirë, me pasimin vendimtar të Tomás Araújos. Grekun e shohin si specialist: me mbrojtësin që hidhej majtas dhe portierin që mbulonte të djathtën, ai e ktheu goditjen në drejtimin tjetër.

Nga pesë golat e fazës së ligës me më shumë pasime, tre i ka shënuar Benfica. Durimi në Lisbonë, me sa duket, paguan.